環台騎跡 Day 7 - 係壽卡打卡!

Day7, 29/3/2016（二）

當日騎行里程：69km
當日騎行時間：上午約1030 - 1930
住宿：金崙城堡溫泉旅館 TW$2500
天氣：天晴
足跡：1030枋山→1430壽卡→1930金崙
海拔高度落差：10 - 455米

上壽卡...有種打大佬的感覺。因為從來未試過踩單車上到咁高，這是環島南迥的必經之路，是環台之路的最高海拔點，亦是單車無法避免或取代的路線(除非搭火車繞過)，加上山路路面較窄；所以真的挺緊張.....



望著大海食早餐真的很寫意，但內心對上壽卡其實又好緊張，擔心體力應付不了，擔心自己捱不住，於是用海灘的石頭砌了個願望塔，祈求今日順順利利唔使推車上壽卡!

享受了一個海邊早餐之後，再係旅館打咗幾鋪食鬼之後就整裝出發

大概酒店太舒服，有人駝鳥心態的不太願離開，玩食鬼玩到欲罷不能.....

女僕打扮的服務生，應該吸引到很多宅男........XD


一路向南走，不久就到楓港路口，之後就開始上山了，上斜→平路→上斜→平路，最辛苦唔係上斜，係逆風，破落山風勁嘥力，中午又曬又熱，山路窄又多車，真係好攞命。但都好好彩間唔中就有緩衝的平路喘息，唔使一味直上。斷斷續續休息咗三幾次，亦試過途中聽到單車噠噠聲驚有事停低檢查，最後發現應該是反光板鬆了拍響車轆條。   有幾鑊大上真係好難頂，馬路好窄亦唔敢停下，鬼叫我肥呀頂硬上！
 

今日簡直充分練習轉波，細餅拖大餅慢慢上，務求輕踩踏慳力上。過程好似好漫長但又好似好快就過，約下午兩點，見到壽卡驛站前3公里有記號倒數真係好振奮，最後一公里係最激動。  

可惜驛站無開，沒有波麗士大人只有波麗士狗狗，一來到就靠過來親自搜身，大概所有經過壽卡的車友都要接受牠的過關檢查吧！？😜😁😅 單車環台之路最蝦人的路段--壽卡，係所有單車友的地獄與天堂，27公里路無間斷上坡，從海拔10米上455米，用咗約四個鐘，無落過車推，全程踩，有辛苦無痛苦！！💪😤  

之後的落斜其實更唔可以掉以輕心，反而比上斜緊張，上斜腳辛苦，落斜手辛苦，摙break摙到手軟，而且下晝愈來愈熱鬧，沿途有很多旅巴卡車貨車貼在旁邊經過。


終於在落到半山時見到補給站七仔，下晝3點幾4點先食午餐

以為從南迴公路落金崙好近，所以之前已定下目標去金崙溫泉鄉下榻浸溫泉，點知都踩咗兩個幾鐘先到，仲入黑黑齊，心情又累又差，因為太黑睇唔清楚路面，睇唔到目標又唔知幾時上完斜幾時要上幾多斜，原來嚟到呢度先最想爆粗，發誓之後入黑唔踩囉！癲㗎！ 

今日上斜上壽卡都踩咗69公里，好痴線！ 去到金崙即搵溫泉旅館，walk in嚟到最近路邊的城堡溫泉旅館，還好性價比算高，環境清幽得來又舒適，浸溫泉消除疲勞，溫泉鄉消除疲勞一流，是衝完上壽卡之後最大的慰藉。

房子細細，但房外有個很大的空間給我們放車兼晾衫，非常棒!

在半戶外的木桶浸溫泉

苦盡甘來.......無晒電了.........早抖!