Vík → Dyrhólaey半島 → Skógarfoss瀑布 → Seljalandsfoss瀑布 → Selfoss 鎮→
Laugarvatn 溫泉
剩返最後兩日行程......愈寫就愈唔捨得寫落去......
因為再寫就要完了，完了，卻忘不了......
多謝 Vík HI 給我一覺好眠，一早還有送了我這兩句：
Make your own MAGIC
NEVER stop DREAMING
在Vík town 對出有個很出名的黑沙灘，黑沙是來自火山的，而當地人就利用這些黑沙來create 一些很獨特的紀念品，例如這個.......不過這個黑沙燭台真的不便宜......
第一個check point是 Dyrhólaey半島，這裡好近Vík，聽說在夏天，這裡是puffin鳥聚居的地方；我們來的不是季節，而且橫風橫雨，所以唔好話雀仔，人都快要吹走了!
Vík 的黑沙灘好特別，海岸線也很優美，可今天給我們看到的，卻是暴風雨級的滄桑美，茫茫天地間，充斥著暴風的怒吼聲
相片唔使tone色都已經灰天黑地，有夠滄涼了......
準備離開Dyrhólaey時，大米實在忍唔住要整整這個困擾了他數天的車頭沙擋，事緣第一天取車時我們已留意到其中一截沙擋掉了下來，我們要求換車，但職員說不用換，會紀錄在案，不會當作是我們弄壞的。人家不肯換我們也沒辦法，但大米說上落斜時也會感到它在拖地，所以他找了條繩子想吊起佢
見他蹲在車頭左弄右弄也不成功，我也只好加入........他試圖將繩子繞到車牌前的散熱網，結果繩子的重量反而令沙擋更向下墮.............我知道佢想點之後，咪諗到不如吊在車頭蓋裡啦.....哈! 一開車蓋就找到支點打結，咁就解決左個問題。 既然租車公司唔想理唔想整(我也知道為左咁小事而入廠整也很無聊....但唔整唔通cut左佢咩)，咁惟有自己出馬解決這問題，雖然有點樣衰，但咁樣先可以令到沙擋唔會愈來愈墮
第二個check point就是 Skógarfoss瀑布，雖然兩者之間的距離沒有差很遠，可是來到這裡又變成藍天白雲! 冰島天氣總是這麼善變呢!
無錯! 又係瀑布! 在冰島真係瀑布多過 7-11 (haha~這比喻有點太過，畢竟冰島也沒有 7-11，不過便利店也真的不多就是了!) =P
據資料說，原本Skógarfoss是在海岸邊的懸崖，後來海岸線一直退至幾公里外，才變成現在這模樣，所以我們才可以走到瀑布底
瀑布25米闊，高低落差有60米，是一個水量豐沛的瀑布
愈走近瀑布，就愈震撼，大量水流直衝下來產生的氣流和濺起的水霧，會讓人招架不住，還有轟轟隆隆的水聲，太瘋狂了!!!
我本就不怕凍，而且著的是防水風褸所以更不怕濕，倒是大米著羽絨還怕濕著涼，一上車搶著要開暖氣的是他，不過開暖氣隨手要開埋「除霧裝置」因為內外溫差會令車頭玻璃有霧氣。
第3個check point，又係foss，好啦呢個真係最後一個了。Seljalandsfoss瀑布就在Skógarfoss不遠處，咁近又一樣係瀑布仲有咩好睇呀........等陣就知!
Seljalandsfoss 瀑布同樣都係60米落差，前身亦是海岸線的懸崖。
史力奇也影張到此一遊相，hmm....張張都係咁，等我都幫你諗返個signature pose先! XD
signature pose @ Seljalandsfoss
我之後找過資料，能這樣子走入瀑布裡面的，在冰島好像只有這條。
由於今日路程很短，所以去完3個check point 到HI check in 都只係四五點。Selfoss HI 是在首都不遠外，大概是一兩小時車程，可我們不想再住入市區，所以就選這間。房間好舒適乾淨，不過就沒有毯子，於是就問主人要啦，佢話唔使啦，開大d個暖氣咪得囉，我地話唔想開咁大暖氣節能嘛........點知佢話唔緊要：we have too much energy!
哇! 真係咁都得! 以我所知冰島有七成以上市民是用地熱能，而冰島火山處處，再生能源地熱發電的確可說是用都用不完.......所以說冰島其實一d都唔冰囉!!
Selfoss HI 又有個超大廚房，而且工作檯前對著窗和後花園，令煮飯都變成享受!
在hostel 發現很漂亮的天使!!
雖然冰島全國有三十幾間HI，不過運作形式類似加盟經營，所以每一間HI 都有自己不同的性格，而Selfoss HI 是一間畫廊民宿，在室內只要有牆就會有掛畫，而且部份畫作也標了價錢，感覺就像住在畫廊裡，很特別呢! =)
煮左咁多日，終於都輪到我坐係度等食了! hmm............都好豐富好好味喎~
大米難得地好心情，煮完食完仲主動洗埋碗! 抵讚!
食完飯都係六七點，我們又再一次出動了，這時天也開始黑了，雲層再一次轉厚.....算啦，我無再奢望要睇到極光了，倒是隨遇而安地開始欣賞藍藍白白的雲層........講真吖，如果唔係因為北極光，我是挺喜歡天空有雲，因為雲可以把天空裝飾得更有層次美
無錯! 我地又浸溫泉了! 在冰島，真係邊度都有地熱溫泉，他們所說的swimming pool，其實有部份係溫泉；就算唔係溫泉水，都係由地熱加熱的水，所以冰島的swimming pool通常全年開放，而且都是溫水。
多得大米在雜誌見到Fontana，見相片靚又唔貴，而且非旅遊熱景，於是想去試試，一看地址原來很順路，於是就加插這個意外驚喜。它原來就在 Golden circle附近，是一個好寧靜舒服又少人的小鎮 (但後來才知道這小鎮都有HI，早知就book呢度住啦!)
無人的更衣室，北歐的簡約設計，實用與美觀兼備!
約七八點了，個天愈來愈靚! 藍色和雲層都很有層次
香港人gathering通常都係餐廳酒樓、泰國人gathering會在寺廟、韓國人gathering就去汗蒸幕、而冰島人就鍾意一齊去swimming poo!! 好似這個非旅遊熱點Laugarvatn Fontana內，我們也見到的大部份本地人都三五成群的來，一邊浸溫泉一邊閒聊，好鬼梳呼!
成個範圍就好似high class club house，有steam room, 有桑拿房、小童池等....雖然這裡看來像泳池，但其實呢度有最raw的溫泉眼!
要行出去Laugarvatn湖邊真的需要很大勇氣，因為身體一離開溫泉就即刻感到寒冷，而當我們見到有人坐在湖邊時，我們一度以為成個湖都係溫泉暖水
終極 signature pose @ Laugarvatn
頂唔到好耐就快速回來，而最快令全身回暖的方法就是入蒸氣房，steam room的蒸氣是純天然的溫泉蒸氣，同其他用煲水方法弄出蒸氣是不一樣，我們在內坐著期間，就有冰島媽媽這樣跟我們介紹，語氣聽來挺自豪，是的! 冰島的地熱和溫泉的確是冰島人的最大資產。
!@#$%^&*......吹漲，因為他是怕凍不怕熱，相反我就怕熱不怕凍
他有他在裡面乾煎，我就鍾意留在外面頭凍身暖..... (+_+)
人地收9點，我地就真係浸到8點幾先施施然上水，用他們提供的冰島草本沐浴露，舒舒服服沖個涼。
出到來，有個buffet bar，一d都唔平........而且我們是食飽飽才來的.......但食物賣相好好味，而且浸完溫泉又有點口痕........真係好想食呀....
~~~~~~~~~~~~ * ~~~~~~~~~~~~ * ~~~~~~~~~~~~~ * ~~~~~~~~~~~~
在冰島學習的第九堂課：「天氣不似預期」
每一次旅行，除了希望一切順利，就是天天天晴
可是冰島教識我的，是「天氣不似預期」
我們不可以期望每一趟旅行都是完美
就正如人生不可能永遠一帆風順
現實環境我們永遠改變不了
面對了幾天冰島的風風雨雨陰晴不定
讓我明白要愛冰島，就不能只做她的「好天氣朋友」
她的善變，她的情緒化，我也愛定了
因為就算她黑面、摑風、又或不停哭.......無論點佢都係咁靚!
好難嬲得佢落囉!! ╮(╯_╰)╭
沒有留言:
張貼留言