DAY 2 (Apr 7)
Museumplein → Albert Cuyp market → 船屋睇樓團 → 瘦橋 → Damrak Canal Cruise三大運河(紳士,王子,國王) → Sex Museum → ah超市
今日，又再挑戰徒步逛 Amsterdam，究竟雙腳可以帶我走到多遠呢?!
阿姆斯特丹除了是荷蘭的首都之外，它本身也是一個很有趣的城市，明明很現代化，但是市中心仍然保留了數之不盡的經典荷式建築和別具特式的運河，漫步舊城區，可說是一步一景，景景不同。
今早仍然是陰天，不過Amsterdam市春意甚濃，花開處處!
原本來荷蘭是為了看鬱金香，點知第一眼看到的竟然是櫻花!!
哇~ 一棵靚過一棵!! 在荷蘭的櫻花樹好靚~
櫻花開滿樹~ 好澎湃~
Amsterdam的標誌．單車
從旅館行去國立博物館只有700米，過到來原本是想買HollandPass 順便入場參觀，點知museum只賣museum card，所以又走返出來，決定改變計劃不入場了
國立博物館外有一片草地，好開揚，仲有一片花樹海!
離開博物館，望一望個地圖，再開埋個GPS，知道大約 一兩公里路，就決定自己行去Albert Cuyp market ，其實人在國外，我特別喜歡用走的，因為步行可以省錢，又可以細看周邊景物，而且春天不凍不熱，走在街上很舒服，還可當作是運動，一舉數得!
喜歡這商店外的設計，型得來又坐得!
Amsterdam的消防車呀!
行左約半個鐘就行到去Albert Cuyp market，呢度係好平民的市集，有點像香港的花園街，乜都有得賣，最啱尋寶! (^_~)
要行Albert Cuyp market就要看時間，只開一至六，早上9點至下午5點
白露筍呀!! 是此行最想食的! 而旁邊的紅莓都唔貴喎! 一陣轉頭再來買你!
荷蘭近海，漁獲很豐富很新鮮，如果我有廚房，一定忍唔住買啲荷蘭海鮮返去煮!!
呢尊佛好peaceful，用色好清雅，like!
在荷蘭鮮花唔只鮮艷，仲賣得好平!
2歐10支 / 5歐30支的鬱金香，好靚好平好想買呀!!
好有趣既招牌! 砂煲罌罉杯杯碟碟乜都出齊 =)
雖然Albert Cuyp market唔太長，不過想買的東西已鎖定，反正一陣再返過來買就可，不想中午未到就背著重物。
下一個目標是 瘦橋，又要行半小時以上，唔緊要，我enjoy喎!
行下行下就遇到一列船屋，就加插個即興的睇樓團節目好了~
在以前，Amsterdam人口在戰後短時間內加劇，所以住屋不足，窮人沒錢在地上住，就惟有住在船屋，政府沒計可施也惟有批准人們住在運河上......
後來，原本是窮人才住的船屋，慢慢變成時尚，住船屋變得比住在地上貴；加上市政府為有效管理運河，船屋不能隨意駐紮，所以不是每一條運河都見到船屋，而漸漸住在船屋的人，就由窮人變成中產
巧遇運河喵~
舒服得佢丫......在曬太陽呢~
依家船屋設計已經唔似一隻船，甚至無摩打唔識行駛，不過簡潔的方型設計就利於住戶
呢個.........好過份啊! 船屋不大，但主人好識享受，把飯廳都搬到屋外了，得閒無事還可以拖著「飯廳」買處遊呢!!
又可以種花又可以有露台，好正呀!!!
我要呢間呀!!!!! 荷蘭係咪人人都識種花架?!
好寫意的參觀完船屋，轉角就見到遠處的瘦橋
在Amsterdam，最寫意的lunch唔係餐廳，而係坐在運河邊的椅子上，享受著涼風、曬著和煦的太陽，望著如畫的風景來個小野餐!
瘦橋是Amsterdam其中一個好出名的地標，是一座會動的橋，出名到連梵高都有畫過它。
瘦橋真的名副其實的很瘦窄! 所以太闊太高身的船都過唔到!
要同樣瘦的船才過到喲~
荷蘭最出名的國民美食Haring，即係鯡魚，是生食，加洋蔥酸青瓜食，好味喎! 不過成2.5-3.5/條，係小貴但又唔飽肚的小食
行完瘦橋就回程了，再一次走入Albert Cuyp market
在荷蘭種花是國民的本能，他們好像天生就識種花，自己家、門前、路邊處處都有花，就連馬路邊的花圃都已經咁靚，Amsterdam實在太得天獨厚了!
再一次遊返過來國立博物館，因為今天之內一定要買到HollandPass
入左去museum外的紀念品店，見到Miffy特別版呀! 一隻好荷蘭~ 一隻就扮梵高，荷蘭獨賣!
左問右問，終於搵到keytours，原本是博物館，但內裡有附設售賣旅遊產品
終於買到HollandPass了，這東西在荷蘭很多地方都用得著，我買了 "7 FREE TICKETS" 72歐元包了3張鬱金香卷和4張風車卷+1張48小時有效的電車pass，而鬱金香卷的價值大於風車卷，所以用得風車卷就先用，鬱金香卷要留來去看花展用。
至於附送的書仔好詳盡介紹荷蘭有咩玩好看和優惠，成本旅遊書咁正! 書封面還是梵高的名畫添!
HollandPass 的風車卷可以兌一小時的Canal Cruise 遊運河，不過要留意時間表。
係縱橫交錯的狹窄運河上，駕駛著又長又寬闊的遊船一點都不易，還好船長唔單只型佬，開船技巧還很高超!! 開船的男人好鬼型呀!!! X9
遊運河好嘆，一邊坐著感受阿姆斯特丹水鄉風情，耳邊就有相關的介紹，而且有成20種語言選擇，連廣東話都有呀! 久違了的廣東話!
呢排屋堪稱經典，當地人叫 "Dancing houses" ，過百年的房子用的是木樁，幾百年過去地樁因窪地下陷而左右傾斜，所以Amsterdam市中心內的舊房子常常出現東歪西斜的情況，最驚險的是........這種房子仍然住人囉!
好舒服咁遊左個運河船河，要同好鬼有型的船長講bye bye~
遊完船河，一上岸過條馬路，我就發現了SEXMUSEUM，呵明明昨天都有經過啦就是看不到，今天不經意又看到了。之前上網爬文我已知道這museum的存在，心中也很糾結，該是去看或是不該看? 這問題好人性，不過很老實說，身為一個C9, 不會對性好奇，最好奇的反而是為什麼有人會為左性而辦一個博物館，究竟SEXMUSEUM有什麼看才是令人最好奇的吧?!
好吧，既然命運要我遇到發現到它，本著 敢玩荷蘭，敢於探索，就入去開開眼界吧! XP
入場費4歐元
hmm........這主題的博物館大概永遠都唔會係香港出現，亦不是很多國家敢辦，所以也算是很好的體驗。以為入去的都是「咸濕佬」嗎?不，我在場內遇到的年青少女看得很興奮呢! 尤其是對著下圖的「大支嘢」她們可是很興奮的攬著不放呢!! haahaha~!
well..........為左令篇網誌出到街，所以打晒格仔架喇!
其餘仲有咩睇就係呢度賣個關子，費事我影晒出來就無驚喜.....不過也說不上是有什麼驚喜，只是很佩服辦館的單位很敢啊~! 勁!
連東洋的展品都有，呢個.....忍唔住想笑! 吊高飛住咁XX......好高難度喎! XD
入性博物館唔等於性開放，荷蘭雖然是讓性工作者合法化，可以公開討論性，但也不代表隨性濫性縱欲；反而他們的公開坦白，可以讓下一代有更正面的性教育，相比很忌諱但又壓抑不住的其他國家，荷蘭人其實坦白得可愛!!
回程又行返去旅館，時間是六七點左右，忍不住立即試試今天買的白露筍，白露筍比青綠色的露筍更矜貴，當造期只是春天四五月，是難得的美食! 可是在hostel只有一個微波爐，在沒有任何廚具調味品的情況下，實在難以煮出什麼驚喜的菜，但白烚的白露筍也很鮮甜，幼身的更是又爽又脆又沒渣!
弄完晚餐還早，剛好把晚上空出來寫postcard了，一到埗時我已有留意postcard的款式，但在amsterdam的遊客區都賣很貴，最平都要1歐元1張，樣式又不吸引；反而今天在Albert market就給我見到很特別的鬱金香形postcard，好可愛很荷蘭!! 而且相對便宜，實在是平靚正! 我還順便買了支鬱金香筆來寫postcard，雖然支筆唔平，不過支筆又特別又靚又實用。
另一張貴成倍的16:9 postcard超靚! 是我心目中最夢幻的花田，好希望之後可以親眼見到........不過就算見唔到，將這postcard寄返俾自己，都有這postcard補償一下......
說荷蘭的postcard貴，點知郵票仲貴!! 甚至是比postcard本身貴! 話說問店家哪裡有郵票賣，他說除了好難見到有的郵局有售外，在煙草店都有賣，咁我行過見到煙草店就入去問啦，海外郵寄要幾錢呀......哇! 歐洲以外的都郵資要1.25歐元起跳呀! 好喇買左郵票返去....細看之下張郵票是1歐元!! 即係話店家每賣一張郵票就賺我3蚊港紙! 我買5張就賺了我十幾蚊!!! 好肉赤呀!!! ............sigh........單是寄postcard就花了過百元! 很誇張呢!!
第二日又買到嘢.....仲愈買愈多.......除了糧餉，手信是見岩就買，買完就唔使再煩諗買咩!
.jpg)
沒有留言:
張貼留言